睇到信報報導，快手(1024)首日就錄得2750億孖展，仲勁過去年螞蟻招股首日，跟住睇唔少評論，都分析到今次快手其實唔抵抽喎，回撥完都係得21.9萬手，如果好似最近醫渡(2158)，有成百一萬人抽，即使B組頭都係一手貨仔。
係嘅，咁多人抽，仲要咁多人抽孖展，的確好似冇乜肉食，21.9萬手，AB組各半，每組10.95萬手，上次醫渡A組有112萬人，B組有4.4萬人，咁照除返開，B組真係得2至3手，咁正路頭槌點都會多過B頭吧，所以B頭得一手亦很大機會。
但戰友有冇留意，醫渡B頭分六手，價值都係萬五蚊，快手一手都皮一，咁快手都唔係好蝕啫，再睇遠啲，農夫山泉(9633)當日B頭都係中4手，都係萬七銀，當日應該都冇人會投訴醫渡及農夫派咁少，因為上市後倍升嘛，照計快手咁大隻，倍升就難啲，但依家個市咁忽，都唔敢寫包單呀。
不過，有別於農夫及醫渡，快手同期都有對手，質素其實唔差，如果戰友注碼有限，其實可以唔理快手去抽心通(2160)及貝康(2170)，同樣係一手皮幾，不過你要make sure你搵到孖展額先，昨天看輝仔，佢都冇開心通孖展。最好的策略，梗係三隻都參與啦，注碼有限，就攻心通及貝康吧，搵唔到額就現金實射吧。
Search